काठमाडौं । निरन्तरको वर्षाले आन्तरिक उडान प्रभावित भएका छन् । काठमाडौंबाट उड्ने अधिकांश उडान प्रभावित भएको त्रिभुवन अन्तर्राष्ट्रिय विमानस्थल कार्यालयले जनाएको छ । भैरहवा, जनकपुर, नेपालगञ्ज र धनगढीबाहेक अन्य स्थानको उडान बन्द रहेको विमानस्थल कार्यालयका निर्देशक तथा प्रवक्ता रिञ्जी शेर्पाले जानकारी दिए ।
“विमानस्थल बन्द छैन । तर अधिकांश उडान प्रभावित छन् । भैरहवा, जनकपुर, नेपालगञ्ज र धनगढीबाहेक अन्त उडान हुन सकेको छैन,” उनले भने, “अन्तर्राष्ट्रिय उडान केही समय होल्ड भए पनि सामान्य छ ।
अविरल वर्षासँगै पहिरो खस्दा काठमाडौं–नौबिसे सडक अवरुद्ध भएको छ । नौबिसे झ्याप्लेखोला सुरुङमार्ग नजिकै लेदोसहित पहिरो खसेपछि सडक अवरुद्ध भएको हो ।
पानी परिरहेकाले पहिरो पन्छाउन कठिन भएको प्रहरीले जनाएको छ । बाटो बन्द हुँदा काठमाडौं भित्रिने र बाहिरिने सवारी साधन रोकिएका छन् । प्रहरीका अनुसार देशका विभिन्न ठाउँमा पहिरो खस्दा सडक अवरुद्ध भएको छ ।
