काठमाडौं, तेक्वान्दोका अन्तर्राष्ट्रिय निर्णायक अशोक खड्का कोरोना भाइरस (कोभिड– १९) भर्चुअल अन्तर्राष्ट्रिय तेक्वान्दो पुम्से च्याम्पियनसिपका लागि निर्णायक मण्डलमा मनोनित भएका छन् । खड्का ग्योरोगी, पुम्से र पारा तेक्वान्दोका एक्लो नेपाली निर्णायक हुन् ।
युएस वेस्ट कोस्ट तेक्वान्दो संघ, पोर्टल्यान्ड, अमेरिकाको तत्वावधान तथा पान अमेरिकन तेक्वान्दो युनियन, पोर्टल्यान्डको आयोजनामा च्याम्पियनसिप हुन लागेको हो । खड्काका अनुसार उनीसहित १३ राष्ट्रका निर्णायक च्याम्पियनसिपका लागि मनोनित भएका छन् ।
एसियाबाट छनोट हुनेमा खड्का एक्लो हुन् । खड्काको मनोनयका लागि नेपाल तेक्वान्दो संघसँग स्वीकृति पनि लिएको बताइएको छ । ४ दिने प्रतियोगिता जुम प्रविधिमार्फत प्रत्यक्ष हुनेछ । च्याम्पियनसिप नेपाली समय अनुसार आज राती १२ः०० बजे सुरु हुनेछ । च्याम्पियनसिपमा नेपालका ६ खेलाडीको सहभागिता रहेको पनि खड्काले बताए ।
प्रतियोगिताबाट संकलित रकम कोरोना भाइरसबाट अत्ति प्रभावित विभिन्न राष्ट्रका अनाथलयमा रहेका खेलाडीलाई सहयोग स्वरुप प्रदान गरिने नेप्लिज तेक्वान्दो एकेडेमी (एनटिए) का अध्यक्ष समेत रहेका खड्काले जनाएका छन् । कोरोना भाइरसको संक्रमण रोक्नका लागि सरकारले दुई महिना भन्दा लामो समयदेखि लकडाउन गरेको छ ।
यस कारण विपन्न परिवारलाई आर्थिक कठिनाई परिरहेको छ । त्यस्ता परिवारलाई सहयोगमा खड्का सक्रियतापूर्वक लागेका छन् । च्याम्पियनसिपबाट प्राप्त हुने पारिश्रमिक पनि अनाथलयमा रहेका खेलाडीलाई सहयोग गरिने आयोजकले जनाएको खड्काले बताए । हाम्रो खेलकुद
