काठमाडौँ । संसद्मा पेस भएको सङ्क्रमणकालीन न्यायसम्बन्धी विधेयक दलहरूको सहमतिका आधारमा टुङ्ग्याउने माओवादी केन्द्र संसदीय दलले निर्णय गरेको छ । मंगलबार बिहान संसदीय दलको कार्यालय सिंहदरबारमा बसेको बैठकले टीआरसी विधेयक संसद्बाट अनुमोदन गर्न मुख्य दलहरूसँग सहमति खोज्ने निर्णय गरेको हो ।
‘मुख्य दलहरूको सहमतिमा टीआरसी विधेयक टुङ्ग्याउन पहल भइरहेको र यसमा प्रतिपक्ष एमालेसमेत सकारात्मक भएको प्रधानमन्त्रीज्यूले जानकारी दिनुभयो । संसद्मा सरकारको बचाउन प्रभावकारी ढङ्गले प्रस्तुत हुन निर्देशन दिनुभयो । संविधान कार्यान्वयनसम्बन्धी धेरैभन्दा धेरै विधेयक सरकारले ल्याउने तयारी गरेको जानकारी गराउनुभयो’, बैठकको निर्णयबारे जानकारी दिँदै पौडेलले भने, ‘यस्तै हामीले पनि शान्ति प्रक्रियाको काम छिटो टुङ्ग्याउन, सरकारको काम प्रभावकारी बनाउन, संविधान कार्यान्वयनसम्बन्धी कानुन ल्याउन आग्रह गर्यौँ । यो अधिवेशनमा हामी आफ्नै ढङ्गले र सत्ता गठबन्धनसँग मिलेर संसद्मा प्रतिवाद गर्नेछौँ ।’
