काठमाडौँ । जनमुक्ति सेनाका पूर्वकमाण्डर कालीबहादुर खाम मगर ‘विविध’लाई चितवन पठाइने भएको छ । ठमेलबाट पक्राउ परेका खामलाई चितवन पठाउन लागिएको जिल्ला प्रहरी परिसर काठमाडौँका एकजना अधिकृतले रातोपाटीलाई बताए । उनी नेकपा ९माओवादी केन्द्र० का केन्द्रीय सदस्य हुन् ।
कोटेश्वर बस्ने रामहरि श्रेष्ठको हत्यामा उनी संलग्न रहेको आरोप छ । २०६५ वैशाख २८ मा नारायणी नदीमा श्रेष्ठको शव भेटिएको थियो ।
चितवनको शक्तिखोरमा जनमुक्ति सेना ‘तेस्रो डिभिजन’को कार्यालय थियो । सो डिभिजनका कमाण्डर थिए कालीबहादुर खाम । डिभिजनको सम्पर्क कार्यालय कोटेश्वर स्थित रामहरि श्रेष्ठको घरमा भाडामा राखिएको थियो । सम्पर्क कार्यालयबाट २०६४ चैत १४ मा हतियार र १७ लाख रुपैयाँ नगद चोरी भएको विषयमा छानबिनको नाममा श्रेष्ठको हत्या भएको प्रहरीको अनुसन्धान निष्कर्ष छ ।
माओवादी लडाकुहरूले २०६५ वैशाख १५ मा श्रेष्ठलाई कोटेश्वरबाट शक्तिखोरमा लगे । त्यहाँ थुनामा राखेर यातना दिएको पीडित परिवारको आरोप छ । शव नारायणीमा भेटिएपछि श्रेष्ठकी पत्नी रमिलाले आफ्ना पतिको अपहरणपछि हत्या गरेको भन्दै किटानी जाहेरी दिएकी थिइन् ।
हत्यामा संलग्न आरोपी ब्रिगेडियर कमाण्डर गोविन्दबहादुर बटाला थुनामुक्त भैसकेका छन् । जिल्ला अदालत चितवनले २०६८ चैत १७ मा बटालालाई ३ वर्ष कैद सजाय हुने फैसला गरेको थियो । सर्वोच्च अदालतले उनलाई सफाइ दिएको छ ।
जिल्ला अदालत चितवनले त्यसबेला खाम फरार रहेको भन्दै मुद्दा मुल्तबीमा राखेको थियो । उनलाई चितवन जिल्ला अदालतमा उपस्थित गराइने चितवनको एसपी भावेश रिमालले जानकारी दिए ।
