चितवन, जेठ २६, चितवनकी एक नर्समा पनि कोरोना भाइरस (कोभिड–१९) संक्रमण पुष्टि भएको छ ।
आज (सोमबार) चितवनमा पुष्टि भएका ३० जना मध्ये एक जना भरतपुर महानगरपालिका–४ की २१ वर्षीया ती नर्स युवती पनि हुन् । ती युवती भरतपुरको मनाकामना अस्पतालमा कार्यरत रहेकी छिन् । भरतपुर अस्पतालका कोभिड–१९ क्लिनिकल कोअर्डिनेटर डा.प्रमोद पौडेलले नर्स युवतीमा कोरोना संक्रमण भएको पुष्टि गरे ।
यो संगै चितवनमा आज एकै दिन तीन जना स्वास्थ्यकर्मी कोरोना संक्रमित भएका छन् । जसमध्ये दुई जना चिकित्सक छन् । संक्रमित एक चिकित्सक भने नारायणी सामुदायिक हस्पिटलमा कार्यरत छन् ।
आज भरतपुरमा परीक्षण गर्दा ३० जनामा कोरोना संक्रमण पुष्टि भएको थियो । जसमध्ये २३ जना चितवनका छन् भने अन्य बाहिरी जिल्लाका छन् ।
यस्तै कोरोना संक्रमितहरुमा सोमबार थप २१ जना डिस्चार्ज भएका छन् । स्वास्थ्य तथा जनसंख्या मन्त्रालयका प्रवक्ता प्रवक्ता डा.जागेश्वर गौतमले २१ जनाले कोरोना जितेर डिस्चार्ज भएको जानकारी दिए । यो सहित निको हुनेको संख्या ४८८ पुगेको छ।
प्रवक्ताका अनुसार निको हुनेमा पुरुष ४१९ र महिला ६९ छन्। सोमबार डिस्चार्ज हुनेमा महिला १ जना र पुरुष २० जना रहेका छन्।बाँकेबाट २० जना र काठमाडौंको बलम्बु अस्पतालबाट एकजना महिलाले कोरोना जितेर घर फर्किएको प्रवक्ता जागेश्वरले बताए।
सोमबार एकैदिन ३१४ जनामा कोरोना भाइरस (कोभिड-१९) संक्रमण पुष्टि भएको छ। प्रवक्ता डा. जागेश्वर गौतमकाअनुसार सोमबार ३१४ जनाको रिपोर्ट पोजिटिभ आएसँगै संक्रमितको संख्या ३७ सय ६२ पुगेको हो। नयाँ संक्रमितमध्ये २९४ पुरुष र २० महिला छन्।
आइतबार मात्रै २१३ जनामा कोरोना संक्रमण पुष्टि भएको थियो भने १०२ जना डिस्चार्ज भएका थिए।हरेक दिन संक्रमितको संख्या बढ्दै गएको छ। सोमबार पीसीआर विधिबाट १ लाख ९ सय ७१ र आरडीटी विधिबाट एक लाख ५६ हजार ९ सय ९१ जनाको नमुना परीक्षण गरिएको छ। पछिल्लो २४ घण्टामा पीसीआर विधिबाट ४ हजार ७ सय ६६ र आरडीटी विधिबाट ११ हजार ९४२ जनाको नमुना गरी १६ हजार ७०८ नमूना परीक्षण भएको छ।
मन्त्रालयका प्रवक्ता डा. जागेश्वरका अनुसार एक लाख ६६ हजार ६६८ जना क्वारेन्टाइनमा छन् । यस्तै आइसोलेसनमा ३ हजार २६० रहेका छन्। ७१ जिल्लामा संक्रमण फैलिएको छ। प्रयोगशालाको संख्या २१ पुगेको छ।
