पक्राउ परेका खामलाई चितवन पठाउने तयारी छ । २०६३ मा माओवादी शान्तिप्रक्रियामा आएपछि व्यापारी श्रेष्ठको कोटेश्वरस्थित घरमा तत्कालीन माओवादीको तेस्रो डिभिजनले सम्पर्क कार्यालय बनाएको थियो । त्यहाँ पैसा र हतियार हराएको घटनाको सोधपुछका लागि भन्दै श्रेष्ठलाई १५ वैशाख २०६५ मा नियन्त्रणमा लिएर चितवनको शक्तिखोरस्थित शिविरमा पुर्याइएको थियो ।
सोही घटनामा माओवादीका तत्कालीन तेस्रो डिभिजनका ब्रिगेड कमान्डर गोविन्द बटाला, कमान्डर कालीबहादुर खाम, केशव अधिकारी, गंगाराम थापा र अर्जुन कार्कीविरुद्ध चितवन जिल्ला अदालतमा कर्तव्य ज्यानको मुद्दा चलाइएको थियो । तर श्रेष्ठको शव जेठ १२ गते नारायणी नदीमा भेटियो । तत्काल शक्तिखोर शिविरले भने उपचारका लागि लाँदै गर्दा बाटोमा मृत्यु भएको रिपोर्ट दिएको थियो ।
२०६८ जेठ १७ मा अदालतले बटालालाई ३ वर्षको कैद सजाय तोकेको थियो भने खाम, अधिकारी र थापा फरार रहेको भन्दै उनीहरुको मुद्दा मुल्तबीमा राखिएको थियो । बटालालाई भने सर्वोच्च अदालतले २०७६ फागुन १८ मा सफाइ दिएको थियो ।
