एजेन्सी: महान फुटबल खेलाडी पेलेको ८२ वर्षको उमेरमा निधन भएको छ । उनी लामो समयदेखि क्यान्सरसँग संघर्षरत थिए ।
ब्राजिललाई तीनपटक विश्वकप उपाधि दिलाएका पेलेको किड्नी तथा मुटुमा समस्या रहेको थियो । उनको उपचारका क्रममा अस्पतालमै निधन भएको हो ।
गत महिना नियमित चेकअप गर्न पेले अस्पताल पुगेका थिए । त्यहाँ नै उनको स्वास्थ्य अवस्था बिस्तारै बिग्रँदै गएको थियो । पेलेको स्वास्थ्यमा कुनै सुधार नआएपछि अस्पतालले उनलाई आइसियूमा राखी उपचार गरेको थियो । आइसियूमा पनि केही सुधार नआएपछि उनलाई विशिष्ट प्रविधियुक्त कक्षमा राखी उपचार गरिएको थियो ।
कतारमा विश्वकप सुरु हुनु दुई साताअघि पेलेले ब्राजिलियन टोलीलाई शुभकामना दिएका थिए । ब्राजिलियन खेलाडीलाई छैटौँपटक विश्व च्याम्पियन बन्न सन्देश दिँदासम्म पनि पेलेको स्वास्थ्यमा केही खराबी आएको थिएन ।
सन् १९५८, १९६२ र १९७० मा पेलेले ब्राजिललाई विश्वकप उपाधि दिलाएका थिए । उनले ब्राजिलियन टोलीबाट ९१ अन्तर्राष्ट्रिय खेलमा ७७ गोल गरेका छन् ।
