काठमाडौँ – स्लोभाकिया पठाइदिन्छु भन्दै ठगी गरेको आरोपमा प्रहरीले एक जनालाई पक्राउ गरेको छ। पाँचथरको फाल्गुनन्द गाउँपालिका–३ घर भइ हाल ललितपुरको नखिपोट बस्ने ४६ वर्षीय एकराज नेम्वाङलाई काठमाडौँ उपत्यका अपराध अनुसन्धान कार्यालयको टोलीले मंगलबार गोंगबुबाट पक्राउ गरेको हो।
प्रहरीका अनुसार नेम्वाङले वैदेशिक रोजगारीमा स्लोभाकिया पठाइदिने भन्दै विजय लिम्बुबाट पटक–पटक गरी १२ लाख रुपैयाँ लिएर सम्पर्कविहीन भएका थिए।
उनले स्लोभाकियामा कन्स्ट्रक्सन कम्पनीका काम लगाइदिने र तलब मासिक २ लाख रुपैयाँभन्दा बढी हुने प्रलोभन देखाएको प्रहरीले जानकारी दिएको छ। आवश्यक कारबाहीका लागि नेम्वाङलाई वैदेशिक रोजगार विभाग पठाइएको प्रहरीले जनाएको छ।
Facebook Comments Box
