विराटनगर । कोसी प्रदेशको मुख्यमन्त्रीमा एमालेका हिक्मत कार्कीले दाबी पेस गरेका छन् । एमाले–माओवादी संसदीय दलका नेता र सांसद प्रदेश प्रमुखको कार्यालयमा भेला भई दाबी पेस गरेका हुन् । दुई दलका ५२ सांसदले हस्ताक्षर गरी दाबी पेस गरेका हुन् ।
दुई दलले एमाले संसदीय दलका नेता हिक्मत कार्कीलाई मुख्यमन्त्री बनाउन माग गर्दै दाबी पेस गरेका हुन् । प्रदेश प्रमुख पर्शुराम खापुङले हिजो (बुधबार) बेलुका नेपालको संविधानको धारा १६८ को उपधारा ५ बमोजिम सरकार गठन गर्न आह्वान गरेका थिए । खापुङले संविधानको व्यवस्था हेरेर मुख्यमन्त्री नियुक्त गर्ने बताए ।
दुई दलले मुख्यमन्त्री केदार कार्कीलाई दिएको समर्थन फिर्ता गरी वैशाख ७ गते प्रदेशसभाबाट संकल्प प्रस्ताव पारित गरी कार्कीलाई विश्वासको मत लिन भनेका थिए । यता, प्रदेश प्रमुखले असंवैधानिक कदम चालेको भन्दै रिट दायर गर्न मुख्यमन्त्री कार्की सर्वोच्च अदालत पुगेका छन् ।
