कन्याम घुमेर फर्किएको विद्यार्थी बाेकेको बस दुर्घटना : एक बालकको मृत्यु, १२ जना गम्भीर

विराटनगर- इलामको कन्याम घुमेर फर्किने क्रममा विद्यार्थी बोकेको यात्रुबस दुर्घटना हुँदा एक बालकको मृत्यु भएको छ । बसमा सवार ३७ जनामध्ये १२ जना गम्भीर रहेको जनाइएको छ ।

जनकपुरबाट शैक्षिक भ्रमणका लागि गएको ना६ख ८४२४ नम्बरको बस इलामको रोङ गाउँपालिका-३ स्थित लसुनेमा सडकबाट तीन सय मिटरजति तल खसेको थियो ।

बस सडकबाट तीन सय मिटर तल खोँचमा खसेका कारण बसमा सवार सबै घाइते भएको प्रहरीले जनाएको छ ।

बसबाट उछिट्टिएका केही यात्रुहरू रुखको हाँगामा समेत अड्किएका कारण उद्धारमा कठिनाइ भएको थियो । घाइते यात्रुहरूलाई उद्धार गरी उपचारका लागि बिर्तामोडस्थित विएण्डसी अस्पताल पठाइएको प्रहरी उपरीक्षक जवेगुले जानकारी दिए । ‘घाइतेहरूमध्ये १२ जनाको अवस्था गम्भीर देखिन्छ, उपचारका लागि बिर्तामोड पठाइसकिएको छ,’ प्रहरी उपरीक्षक​ जवेगुले भने ।