काठमाडौँ, असार २१। पूर्व प्रधानमन्त्री तथा प्रमुख प्रतिपक्षी दल नेपाली काँग्रेसका सभापति शेरबहादुर देउवासँग पूर्वसभामुख तथा नेपाल कम्युनिष्ट पार्टी (नेकपा) का संसदीय दलका उपनेता सुवासचन्द्र नेम्वाङबीच आइतबार बिहान छलफल भएको छ । छलफलमा समसामयिक राजनीतिक विषयमा छलफल भएको बताइएको छ ।
पूर्वसभामुख नेम्वाङ प्रधानमन्त्री केपी शर्मा ओलीको सन्देश लिएर काँग्रेस सभापति देउवालाई भेटन उहाँको निवास बुढानिलकण्ठ पुग्नुभएको थियो । छलफलमा वर्तमान राजनीतिक समस्या र समाधान, कोरोना समस्या र समाधान, नेपाली भूमि फिर्ता, मिलिनियम च्यालेन्ज कर्पोरेशन (एमसीसी) विषयमा केन्द्रित भएर छलफल भएको उपनेता नेम्वाङले जानकारी दिनुभयो ।
बिहान १० बजे भएको छलफलमा काँग्रेस नेता डा. मिनेन्द्र रिजालको पनि सहभागिता थियो । प्रमुख प्रतिपक्षी दलसँग नियमित छलफल गर्नुपर्ने प्रक्रियाअनुसार नै प्रधानमन्त्रीको सन्देश लिएर आफू सभापति देउवासँग छलफल गरेको उपनेता नेम्वाङले गोरखापत्रलाई बताउनुभयो ।
“संसदीय व्यवस्थामा सत्तापक्ष र प्रतिपक्षी दलबीच नियमित समन्वय र सम्पर्क गर्ने प्रावधानअनुसार नै भेटघाट भएको हो, देशको विद्यमान समस्या सत्तापक्ष र प्रतिपक्षी दल मिलेरै सल्टाउनुपर्ने हुन्छ भन्ने उद्देश्यले भेटघाट भयो” नेम्वाङले प्रष्ट पार्नुभयो । प्रतिपक्षी दल राज्यको अभिन्न अङ्ग हुने संसदीय व्यवस्थाअनुसार नै सरकार नियमित समन्वयमा रहेको उहाँले बताउनुभयो ।
भेटका क्रममा सभापति देउवाले नेकपाभित्र देखिएको आन्तरिक मतभेदलाई वार्ता र संवादको माध्यमबाट सल्टाउन सुझाव दिनुभएको थियो । “पार्टीभित्रको आन्तरिक समस्यालाई संवादकै माध्यमबाट सल्टाउन सफल हुनुहोस्, मेरो शुभकामना छ” सभापति देउवाले प्रधानमन्त्री ओलीलाई सन्देश सुनाइदिन आग्रह गर्नुभएको उपनेता नेम्वाङ्ले जानकारी दिनुभयो ।
त्यस्तै, एमसीसी नेपालको हितमा रहेकाले त्यसलाई अनुमोदन गर्न आवश्यक रहेको सभापति देउवाले सो अवसरमा बताउनुभएको थियो । काँग्रेसले एमसीसी अनुमोदनको निर्णय गरिसकेकाले नेकपामा सहमति गरेर पारित गर्ने वातावरण बनाउन देउवाले आग्रह गर्नभएको नेम्वाङ्ले बताउनुभयो । “मित्रराष्ट्र देशले प्रदान गर्ने सहयोग लिनुमै देशको भलाई हुन्छ” देउवाले भेटका क्रममा सुझाव दिनुभएको थियो ।
पार्टी फुट्दैन
यसैबीच, नेकपाभित्र चुलिएको विवादका कारण पार्टी फुट्ने चौतर्फी आशङ्का भइरहेका बेला नेकपा अहिले नफुट्ने बरु झन् बलियो भएर अगाडि बढ्ने नेता नेम्वाङ्ले विश्वास व्यक्त गर्नुभयो । नेकपाभित्र यस्तो समस्या पटकपटक आउने गरेको भएपनि अहिले नै पार्टी फुट्ने कुनै सम्भावना नरहेको बताउनुभयो । दुई अध्यक्षबीच गम्भीररुपले संवाद र वार्ता भइरहेकाले सहमति बन्ने उहाँले विश्वास दिलाउनुभयो ।
आइतबार भएको देउवासँगको भेटमा काँग्रेससँग मिलेर सरकार बनाउने खालको समाचार मिडियामा आएको भए पनि त्यसबारेमा कुनै छलफल नभएको उहाँले प्रष्ट पार्नुभयो । “नेकपाभित्रको विवाद सल्टाउन सुझाव दिनुभएका देउवासँग नयाँ सरकार बनाउन सहयोग माग्ने प्रश्नै उठ्दैन” उपनेता नेम्वाङले भन्नुभयो, “मिडियामा आएकोजस्तो कुनै कुरा भएको छैन, नयाँ सरकार बनाउनुपर्ने परिस्थिति नै आउँदैन ।”
