काठमाडौं । नववर्ष २०७९ आरम्भ एवं राष्ट्रिय झण्डा दिवसको अवसरमा चन्द्रागिरि नगरपालिका वडा नं १, दहचोकमा राष्ट्रिय झण्डा सहित प्रभातफेरी कार्यक्रमको आयोजना गरिएको छ । सामाजिक सद्भाव तथा राष्ट्रिय एकता अभियान नाम दिइएको प्रभातफेरी सिर्जनाचोकदेखि स्थानीय जनसमुदाय एवं विद्यार्थीसहितको ¥याली गर्दै खहरेमा पुगी कोणसभामा परिणत भएको कार्यक्रम संयोजक एवं अभियन्ता श्रीकृष्ण भारतीले जानकारी दिनुभयो ।
कोणसभालाई सम्बोधन गर्दै कार्यक्रमका प्रमुख अतिथि एवं चनपा वडा नं १ का अध्यक्ष राजेन्द्र के.सीले राष्ट्रिय झण्डाको महत्वका विषयमा प्रकाश पार्दै शुभकामना व्यक्त गर्नुभयो । यस्तै वरिष्ठ लोक सर्जक कृष्ण वस्नेतले राष्ट्रिय झण्डाको महत्व झल्कने लोक भजन प्रस्तुत गनुभयो । यस्तै राजनीतिकर्मी राजु बखतीले मन्तव्य राख्नुभयो । अभियन्ता श्रीकृष्ण भारतीको नेतृत्वमा दहचोकमा निरन्तर रुपमा वैशाख १ गते झण्डा दिवस विविध कार्यक्रम सहित गरिंदै आएको छ ।
